Fjöldi mynda prýðir bókina
Fjöldi mynda prýðir bókina

Kómedíuleikhúsið undirbýr nú útgáfu á bókinni Leikræn tjáning. Höfundur bókarinnar er Elfar Logi Hannesson, Kómedíuleikari, sem hefur kennt leiklist um land allt í næstum tvo áratugi. Fjármögnun bókarinnar fer fram á hinum stórgóða vef Karolina fund á slóðinni www.karolinafund.com/project/view/620 

Þar geta áhugasamir tekið þátt í ævintýrinu á margan hátt og bara hagnast. Allt fer þetta eftir því hve mikið þú leggur í pottinn. Þannig getur þú fengið allt frá áritaðri bók í 10 eintök og meira að segja heilt leiklistarnámskeið líka og meira að segja tvö.

Leikræn tjáning er kennslubók fyrir fólk á öllum aldri. Bókin hentar fyrir alla þá sem hafa áhuga á leikrænni tjáningu hvort heldur kennarar eða njótendur listarinnar. Leikræn tjáning er í raun æfingabanki sem inniheldur fjölbreyttar æfingar allt frá spunaæfingum til trúðalista og allt þar á milli. Leggið okkur lið svo við getum sett prentvélarnar í gang

www.karolinafund.com/project/view/620 

 

þriðjudagurinn 23. september 2014

Leikárið er á leiðinni

Þá fer alveg að koma að því. Þessu árlega og kómíska. Að kynna nýtt leikár. Bæklingurinn er þegar kominn í prentun og er væntanlegur í byrjun næstu viku. Á sama tíma verður leikárið kynnt sérstaklega hér á heimasíðunni. Eitt er víst þetta verður kómískt leikár. Fylgist með. 

þriðjudagurinn 2. september 2014

Halla fer í leikferð

Halla fer á flakk
Halla fer á flakk

Að vanda verður Kómedíuleikhúsið á ferð og flugi á leikárinu með sýningar sínar. Fyrsta leikferð þessa leikárs er nú í undirbúningi. Farið verður með hið vinsæla barnaleikrit Halla í skóla fyrir vestan, norðan og austan vikuna 15. - 21. september. Nú þegar hafa skólar á Reykhólum, í Fjallabyggð, Seyðisfirði og á Egilsstöðum bókað sýningu og fleiri eru í startholunum.

Barnaleikritið Halla var frumsýnt síðasta vor í Gamla sjúkrahúsinu á Ísafirði. Síðan þá hefur leikurinn verið sýndur víða m.a. í Bolungarvík og Gaflaraleikhúsinu í Hafnarfirði. Halla fjallar um samnefnda stúlku sem býr hjá afa sínum í dálitlu þorpi við dálítinn sjó. Það er margt sem þarf að gera í þorpi út við sjó og hve mikið sem fiskast það fiskast aldrei nóg. Afinn sækir sjóinn enda er hann mikil aflakló og það er Halla afastelpan hans einnig. Svo gerist það dag einn að afi segir við Höllu: Þú ert ekki nógu feit það er mér nokkuð kappsmál að koma þér í sveit. Þá tekur sagan á sig ævintýralega mynd en allt fer þó vel að lokum.

Leikritið Halla er byggt á samnefndri ljóðabók eftir vestfirska skáldið Stein Steinarr. 

fimmtudagurinn 21. ágúst 2014

Fjalla-Eyvindur í Gamla-bankanum Selfossi

Fjalla-Eyvindur í banka á Selfossi
Fjalla-Eyvindur í banka á Selfossi

Í tilefni af því að 300 ár eru liðin frá fæðingu Fjalla-Eyvindar verður einleikur um söguhetjuna úr smiðju Kómedíuleikhússins sýndur á lofti Gamla-bankans á Selfossi. Hinn gamli banki er til húsa að Austurvegi 21 og verða sýningar á Fjalla-Eyvindi föstudaginn 29. ágúst og sunnudaginn 31. ágúst kl.20. Á undan sýningunni verður Hjörtur Þórarinsson með fyrirlestur um Fjalla-Eyvind. Miðaverð er aðeins 2.500. - kr og miðasölusíminn er: 894 1275.

Húsið opnar kl.19.30 báða sýningardagana. 

laugardagurinn 16. ágúst 2014

Gísli kemst bara ekki í súrinn

Engin leið að hætta
Engin leið að hætta

Verðlaunaleikurinn Gísli Súrsson hefur verið sýndur sleitulaust síðan í lok febrúar 2005 bæði hér heima og erlendis. Sýningar nálgast 300 og til stóð að setja sýninguna endanlega í súr 20. ágúst næstkomandi en þá verða einmitt tvær sýningar á leiknum. En við erum ekki vön því að segja nei í Kómedíuleikhúsinu og því höfum við bætt við nokkrum sýningum bæði í september og október. Það er bara þannig að það eru forréttindi að fá að sýna íslenskt leikverk svona oft og ef eftirspurnin er enn til staðar. Nú þá bara höldum við áfram. Svo einsog staðan er núna þá er loka sýning á Gísla Súrssyni 22. október á Gíslastöðum í Haukadal. Ef einhver pantar eftir það nú þá bara geymir Gísli sína súrlegu um stund. 

föstudagurinn 1. ágúst 2014

Fjalla-Eyvindur á Inndjúpshátíð

Fjalla-Eyvindur mætir í Heydal
Fjalla-Eyvindur mætir í Heydal

Núna á laugardag verður Inndjúpsdagurinn haldin hátíðlegur í Heydal í Mjóafirði. Margt verður til skemmtunar og fróðleiks frá morgni til kvelds. Leikritið Fjalla-Eyvindur verður sýnt kl.18 og þar á eftir verður hlaðborð með gósmætum úr Djúpinu. Þetta er í fjórða sinn sem hátíðin er haldin og hefur Kómedíuleikhúsið ávallt tekið þátt í gleðinni. 

Nánari upplýsingar um Inndjúpsdaginn í Heydal er á heydalur.is 

fimmtudagurinn 24. júlí 2014

Sumarfrí

Fjalla-Eyvindur gefur taktinn eftir sumarfrí á Inndjúpsdögum um Verslunarmannahelgina.
Fjalla-Eyvindur gefur taktinn eftir sumarfrí á Inndjúpsdögum um Verslunarmannahelgina.

Þá er hafið stutt kómískt sumarfrí. Sumarið hefur sannarlega verið tíminn hjá Kómedíuleikhúsinu. Mikið að gera sem er bara alveg frábært. Mestu hefur farið fyrir verðlaunasýningunni Gísli Súrsson. Aldrei hafa sumarsýningar á Gísla verið jafnmargar eða 20 talsins. Enda vel við hæfi því í haust lýkur sýningum enda erum við að detta í 300 sýningar sem sannarlega hafa ekki verið súrar. Allt tekur enda og mun lokasýning á Gísla Súrssyni vera í september á Víkingahátíð fjölskyldunnar sem fer fram á söguslóðum nefnilega á Gíslastöðum í Haukadal. Leikurinn verður hins vegar kvikmyndaður og gefin út á mynddiski sem mun án efa rata í margan jólapakkann. Fjalla-Eyvindur hefur og farið mikinn í sumar og fyrsta verk eftir sumarfrí verður einmitt að sýna þann vinsæla leik. Þá verður Fjalla-Eyvindur sýndur á Inndjúpsdögum í Heydal í Mjóafirði um Verslunarmannahelgina. Þetta er fjórða árið í röð sem sú hátíð er haldin og hefur Kómedíuleikhúsið verið partur af Inndjúpsdögum frá upphafi. 

Sumarið er tíminn njótum þess í faðmi fjölskyldunnar og sjáumst hress. 

mánudagurinn 14. júlí 2014

Gísli Súrsson á Miðaldasögum á Gásum

Gísli Súrsson verður í Eyjafirði á helginni
Gísli Súrsson verður í Eyjafirði á helginni

Verðlaunaleikurinn Gísli Súrsson verður sýndur á hinni árlegu Miðaldadögum á Gásum Eyjafirði. Hátíðin fer fram núna á helginni og verður Gísli sýndur dalega alla dagana. Fyrsta sýning verður á íslensku á föstudeginum 18. ágúst. Leikurinn veðrur síðan sýndur á ensku á laugardag og sunnudag.

Gísli Súrsson hefur verið sýndur víða og margoft þetta sumarið. En nú fer að líða að langtíma súr því síðstu sýningar eru núna í ágúst á Gíslastöðum í Haukdal.

þriðjudagurinn 8. júlí 2014

Fjalla-Eyvindur á Snæfjallaströnd á helginni

Fjalla-Eyvindur fer Djúpið og verður á Dalbæ á helginni
Fjalla-Eyvindur fer Djúpið og verður á Dalbæ á helginni

Leikritið vinsæla Fjalla-Eyvindur verður sýnt á Dalbæ á Snæfjallaströnd komandi laugardag. Þá verður þess minnst sérstaklega að í ár er 300 ára afmæli hins merka útlaga Eyvindar Jónssonar sem þekktur varð sem Fjalla-Eyvindur. Á undan sýningunni mun Hjörtur Þórarinnsson flytja erindi um þau Eyvind og Höllu en nýlega kom út bók hans um efnið. Fjalla-Eyvindar stundinn á Dalbæ á Snæfjallaströnd á laugardag 12. júlí hefst kl.18.00. Miðaverð er 2.900.- kr en sérstakt tilboð til félagsmanna Snjáfjallaseturs. 

Leikritið Fjalla-Eyvindur hefur fengið afbragðsgóðar viðtökur enda er hér á ferðinni ótrúleg saga eins merkasta útlaga þjóðarinnar. Höfundur og leikari er Elfar Logi Hannesson. Höfundur tónlistar er Guðmundur Hjaltason, leikmynd, búninga og leikstjórn annast Marsibil G. Kristjánsdóttir. 

mánudagurinn 30. júní 2014

Síðustu stundir Gísla á leiksviðinu

Gísli fer af leiksviðinu og yfir á mynddisk
Gísli fer af leiksviðinu og yfir á mynddisk

Einsog komið hefur fram hér á heimasíðunni þá lýkur brátt sýningum á verðlaunaleiknum Gísli Súrsson. Síðasta opna sýningin var í síðustu viku og aðeins eru eftir sýningar fyrir hópa. Þær sýningar eru allar á ensku en gaman er að geta þess að síðustu tvö árin hefur leikurinn verið sýndur oftar á ensku en á íslensku. Hópasýningarnar eru allar á söguslóðum Gísla nefnilega á Gíslastöðum í Haukadal. Einnig verður Gísli Súrsson sýndur á Miðaaldahátíðinni á Gásum 18. - 20. júlí. 

Þó sýningum á Gísla Súra ljúki í ágúst þá má verður áfram hægt að horfa á þessa vinsæla sýningu. Því í haust verður leikurinn tekinn upp og verður fáanlegur á mynddiski fyrir jólin. Þar höfum við það jólagjöfin í ár er Gísli Súrsson. Þannig verður hægt að horfa á leikinn aftur og aftur. 

Eldri færslur