Kómedíuleikhúsið sýnir leikritið Beðið eftir Beckett í Haukadal. Sérlega takmarkaður sætafjöldi vegna Kóvítans. Miðasala hafin í síma: 891 7025.
Frumsýning sun. 30. ágúst kl.20.01 UPPSELT
2. sýn. mán. 31. ágúst kl.20.02
3. sýning. þri. 1. september kl.20.03
Miðasala fer aðeins fram í síma 891 7025.
Kómedíuleikhúsið frumsýnir sunnudaginn 30. ágúst í leikhúsi sínu í Haukadal Dýrafirði nýtt leikrit, Beðið eftir Beckett. Leikur þessi er um margt einstakur fyrir það fyrsta varð tilurð hans þegar öllum leikhúsum var lokað sökum Kóvítans og leikhúsfólkið hefði ekkert betra að gera en að æfa. Reyndar höfðu Kómedíuleikarinn, Elfar Logi, og Trausti Ólafsson, höfundur leiksins, lengi rætt það að gera lekskáldinu Samuel Beckett skil á íslensku leiksviði. Sko og svo, það skapast tækifæri í hverri stöðu. Trausti settist við og ritaði leikritið og í vor hófust svo æfingar rafrænt. Þar sem leikarinn var í leikhúsinu okkar hér vestra og lék fyrir framan tölvu og við aðra tölvu í Reykjavík sat Trausti og leikstýrði. Æfingar í raunheimum hófust síðan í sumar og svo aftur í ágúst. Nú er biðin loks á enda því Beðið eftir Beckett verður frumsýnt í Kómedíuleikhúsinu Haukadal 30. ágúst einsog getið var í upphafi.
Auk Elfars Loga og Trausta koma listamennirnir Marsibil G. Kristjánsdóttir og Hjörleifur Valsson að uppsetningunni. Marsibil hannar búninga og leikmynd en Hjörleifur semur tónlist fyrir leikverkið. Siguvald Ívar Helgason hannar lýsingu og loks kemur ungur dýrfirskur leikari við sögu í leiknum. Sá heitir Þrymur Rafn Andersen og er í hlutverki Sendiboða. Stefnan er sett á að fara með leikverið víðar um landið og þá munu aðrir ungir leikarar bregða sér í hlutverk Sendiboðans.
Sökum Kóvítans verður sérlega góðmennt í leikhúsinu hverju sinni því hefur verið ákveðið að hafa þrjár sýningar í röð í Haukadal. Fyrst sunnudaginn 30. ágúst svo daginn eftir 31. ágúst og loks þriðjudaginn 1. september. Allar sýningarnar hefjast kl.20.00 og eru aðeins örfá sæti í boði á hverja sýningu. Miðasala hefst mánudaginn 24. ágúst. Miðasölusíminn er 891 7025.
Mennta og menningarmálaráðuneytið styrkir uppsetninguna á Beðið eftir Beckett, einlægar þakkir fyrir traustið.
Kómedíuleikhúsið sýnir leikritið Iðunn og eplin við Byggðasafnið á Ísafirði merkisdaginn 17. júní komandi. Sýningin hefst kl.14.00 og er aðgangur ókeypis. Leikritið Iðunn og epliln var frumsýnt í Grunnskóla Flateyrar fyrr í vetur og hefur síðan verið sýnt víða í skólum. Einsog nafnið gefur til kynna er hér sótt í hinn norræna goðaheim. Heimdallur, varðmaður goða og gyðja, segir okkur sögur úr Ásgarði. Að þessu sinni er það sagan af því þegar Iðunni og gulleplum hennar var rænt. Höfundur og leikari er Elfar Logi Hannesson, leikstjórn, leikmynd, brúður og grímur gerði Marsibil G. Kristjánsdóttir.
Sýningin á 17. júní er liður í tvíhliðasamningi Kómedíuleikhússins við Ísafjarðarbæ.
Nú getur þú komið í bakland Kómedíuleikhússins með því að styrkja leikhúsið með mánðarlegu framlagi. Það er einfalt að koma í áskrfit þú ferð bara inná fjármögununarsíðuna karolinafund.com og þar getur þú valið þér upphæð að vild. Einsog við segjum í leikhúsinu þá eru öll hlutverkin jafn mikilvæg. Það eru ýmsir möguleikar í áskriftinni þannig getur gerst:
Hvíslari fyrir 990.- kr. á mánuði
Miðasölustjóri fyrir 1.980.-kr mánuði
Leikmyndahönnuður fyrir 4.125.-kr á mánuði
Ljóshönnuður fyrir 5.280.- kr. á mánuði
Leikstjóri fyrir 8.910.- kr. á mánuði
Leikari fyrir 16.500.- kr á mánuði
Með því að leggja okkur lið þá eruð þið að efla eina atvinnuleikhús Vestfjarða með einstökum hætti. Mikið rosalega þykir okkur vænt um það.
Komedu í Kómedíuleikhúsáskrift á www.karolinafund.com
Á einstökum tímum þarf að grípa til einstakra ráða. Þema þessa leikhússumars verður að sýna þar sem engin býr. Munum við hefja leik 4. júní í Haukadal í Dýrafirði, þar sem engin býr, og sýna Gísla á Uppsölum. Í lok júní sýnum við í öðrum íbúalausum dal í Selárdal í Arnarfirði. Þar sýnum við Listamaninn með barnshjartað í kirkju listamannsins. Miðasala hefst í maí.
Nú er bara spurningin. Ætli einhver mæti?
Gleðilegt sumar öll sem eitt. Mikið er nú gott að sumarið sé komið þó það sé bara á dagatalinu, tíðin verið frekar erfið í vetur og svo þessi kóvítans veira. Hinn fyrsti dagur sumars lofar góðu hér á leikhúseyrinni, það er bjart og maður sér meira að segja yfir fjörð það hefur nú ekki alltaf verið þannig síðustu misseri.
Kómedíuleikhúsið tekur sumrinu sérlega fagnandi og mun leikhúsið okkar yða að lífi í sumar. Þá tökum við í notkun okkar eigið leikhús, Gíslastaði í Haukadal Dýrafirði. Líklega er þetta minnsta atvinnuleikhús á Íslandi tekur aðeins 25 í sæti. Opnunarsýning leikhússins verður endurfrumsýning á einu af allra vinsælustu verkum okkar, Gísli á Uppsölum. Leikur sem var sýndur 83 sinnum bæði í Þjóðleikhúsinu og um land allt. Gísil á Uppsölum snýr aftur fimmtudaginn 4. júní á Gílsastöðum. Miðasala hefst í maí. Gísli á Uppsölum verður síðan á fjölunum alla fimmtudag í júní á Gíslastöðum Haukadal Dýrafirði.
Gleðilegt leikhússumar.
1. KÓMEDÍA VERÐUR TIL.
Árið 1997 er Kómedíuleikhúsið stofnað í Reykjavíkurborg af tveimur nýútskrifuðum (sumir segja útskúfuðum) leikurum. Fyrsta verkefni leikhússins var Kómedía ópus eitt frumsýnt um haustið. Sumarið eftir tveir stuttir trúðaleikir sýnir. Eftir það taka við stórkómískir tímar annar helmingurinn flytur af landi meðan hinn flytur útá land og tekur leikhúsið með sér.
Kómedíuleikhúsið hefur gefið út nýja vestfirska leiksögubók, Leiklist og list á Þingeyri. Höfundur bókarinnar er Elfar Logi Hannesson, leikari, en hann ritaði einmitt Leiklist á Bíldudal sem við gáfum út 2015. Bókin fæst nú á sérstöku hátíðarverði hjá okkur á litlar 2.900.- krónur. Pantanir berist á netfangið komedia@komedia.is
Í þessari nýju leiklistar og listabók rekur Ellfar Logi Hannesson á fróðlegan og ferskan hátt hina einstöku leiklistar- og listasögu Þingeyrar. Fer reyndar víðar því allur Dýrafjörðurinn er undir enda falla vötn öll þangað hvort heldur það er í listinni eða lífinu. Leiklistarsagan er sögð allt frá landnámi Dýrafjarðar til nútímans. Víða er leitað fanga í listasögu svæðisins enda stendur listin á gömlum merg á öllum sviðum listanna.
Elfar Logi hefur áður ritað leiklistarsögu Bíldudals enda hefur hann að markmiði að skrá leiklistarsögu allra þorpa og bæja á Vestfjörðum. Í þessu riti bætir hann um betur með því að rekja einnig listasögu Þingeyrar. Leiklist og list á Þingeyri er önnur bókin í þessari vestfirsku leiklistarbókaröð Kómedíuleikhússins.
Það var hátíðardagur á Flateyri í gær, 12. febrúar, þá frumsýndi Kómedíuleikhúsið nýtt íslenskt leikrit Iðunn og eplin í Grunnskóla Flateyrar. Var þetta í fyrsta sinn sem Kómedíuleikhúsið frumsýndi á Flateyri en leikritið Iðunn og eplin er hinsvegar 47 uppfærsla Kómedíuleikhússins. Einsog nafnið gefur til kynna er hinn geggjaði goðaheimur undir í þessu nýja leikverki. Varðmaður goðanna Heimdallur er mættur til jarðar til að segja frá hinum norrænu goðum og lífinu í þeirra höll, Valhöll. Svo dregur til tíðinda þegar Iðunni er rænt og ekki nóg með það heldur einnig gulleplum hennar. Sem eru í raun töfraepli. Einu sinni í mánuði á stóra epladeginum fá goðin epli Iðunnar en nú stefnir í að goðinn verði bara gömul og grá því Iðunni og eplunum hefur verið rænt. Auðvitað var það Loki lævísi sem átti hlut að máli. Hvernig fer þetta eiginlega?
Önnur sýning á goðafræðistykkinu Iðunn og eplin var í morgun, 13. febrúar, á leikhúseyrinni í Grunnskóla Þingeyrar. Í næstu viku verða fjórar sýningar á leiknum fyrir æskuna á Ísafirði.
Að vanda stefnum við á leikferð með Iðunn og eplin um landsbyggðina í framhaldinu á sýningunum hér vestra.
Það er Uppbyggingasjóður Vestfjarða sem styrkir uppfærsluna á Iðunn og eplin.
Hin ástsæla sýning Dimmalimm verður sýnd í Hofi Akureyri núna á sunnudag 19. janúar. Aðeins örfá sæti laus þegar þetta er ritað svo tryggið þér miða strax í dag á miðasöluvefnum tix.is
Leikritið Dimmalimm var frumsýnt í Þjóðleikhúsinu í mars 2019. Síðan þá hefur leikurinn verið sýndur víða um land en sýningin í Hofi er sú 34. Dimmalimm er án efa eitt ástsælasta ævintýri þjóðarinnar. Samið og myndskreytt svo einlæglega og fagurlega af bílddælska listamanninum Guðmundi Thorsteinssyni eða Muggi.
Fleiri sýningar á Dimmalimm eru fyrirhugaðar á árinu svo fylgist vel með hér á heimasíðunni okkar. Hér eru alltaf einhverjar ævintýralegar fréttir.
