Óhætt er að segja að vel hafi gengið hjá atvinnuleikhúsi Vestfjarða á liðnu leikári. Alls voru frumsýnd þrjú ný íslensk leikverk . Fyrsta frumsýning leikársins var í lok nóvember 2011. Þar var á ferðinni bráðfjörugt jólaleikrit Bjálfans barnið og bræður hans sem fjallar um vestfirsku jólasveinana. Leikurinn var sýndur í Listakaupstað á Ísafirði og var þetta jafnframt fyrsta leikverkið sem er sýnt þar. Sýningin fékk frábærar viðtökur og var sýnd alls 12 sinnum í kaupstaðnum fyrir fullu húsi. Næsta verk var frumsýnt í lok mars og að vanda var sótt í vestfirskan saganaarf. Nástönd - Skáldið á Þröm nefnist leikurinn og fjallar um alþýðuskáldið Magnús Hj. Magnússon. Sýnt var á söguslóðum á Suðureyri við Súgandafjörð. Sýningar voru alls níu og auk þess verður leikurinn sýndur á Act alone leiklistarhátíðinni um næstu helgi. Þriðja og síðasta frumsýning leikársins fjallaði einnig um alþýðulistamann á Vestfjörðum. Enn var sýnt á söguslóðum og nú í Selárdal í Arnarfirði. Þar er sannkölluð ævintýraveröld sem Samúel Jónsson reisti sem er þekktur undir gælunafninu Listamaðurinn með barnshjartað. Sýnt var á sérstakri Sambahátíð og fékk sýningin mjög góðar viðtökur. Margt fleira var brallað á leikárinu. Farið var í sérstaka haustleikferð með sögulegu einleikina Bjarni á Fönix og Jón Sigurðsson strákur að vestan. Sýnt var á 16 stöðum á jafnmörgum dögum. Vinsælasta sýning Vestfjarða Gísli Súrsson var að vanda sýndur en gaman er að geta þess að flestar sýningarnar voru á ensku. Loks var miðaldaleikurinn Jórsalafarinn sýndur um Verslunarmannahelgina í Heydal. Semsé sérlega kómískt og sögulegt leikár.

Nú stendur yfir undirbúningur fyrir næsta Kómedíuleikár 2012 - 2013. Ekkert er gefið uppi ennþá um hvað mun vera á fjölunum en þó má lofa því að ný íslensk leikverk verða á efnisskránni og efnið verður sótt í hinn gjöfula vestfirska sagnaarf.

Kómedíuleikhúsið þakkar áhorfendum sínum um land allt fyrir leikárið sem var að líða. Hlökkum til að sjá ykkur öll og miklu fleiri á komandi Kómedíuleikári.

Inndjúpsdagar verða haldnir í Heydal laugardaginn 4. ágúst. Þetta er í annað sinn sem dagurinn er haldin hátíðlegur en hér er saga Vatnsfjarðar í aðalhlutverki. Kómedíuleikhúsið samdi sérstakan einleik fyrir Inndjúpsdaga og verður leikurinn sýndur nú á laugardag. Leikurinn heitir Jórsalafarinn og verður á fjölunum í Heydal kl.17. á laugardag. Verkið rekur sögu Vatnsfjarðar allt frá landmámi til miðaldar eða um fimm hundruð ár og það á aðeins 24. mínútum. Aðalsögupersóna leiksins er þó Björn Einarsson sem er betur þekktur undir gælunafninu Jórsalafarinn. Var hann víðförull mjög, höfingi og valdsmaður en kunni þó að skemmta sér eigi sjaldnar en þrisvar í viku. Nánar tiltekið á sunnudögum, þriðjudögum og fimmtudögum. Höfundur og leikari er Kómedíuleikarinn Elfar Logi.

Hin einstaka leiklistarhátíð Act alone verður haldin dagana 9. - 12. ágúst. Að þessu sinni verður hátíðin haldin á Suðureyri við Súgandafjörð en þetta er níunda árið sem Act alone er haldin. Kómedíuleikhúsið tekur þátt í fjörinu og sýnir hina rómuðu sýningu Náströnd - Skáldið á Þröm. Sýnt verður í Þurkveri á Suðureyi á opnunardegi Act alone fimmtudaginn 9. ágúst. Dagskrá Act alone í ár er sérlega vönuð og eineikin. Eitthvað fyrir alla og það er frítt inná alla viðburði hátíðarinnar, sem er nú bara einleikið. Meðal þeirra sem koma fram á Act alone 2012 má nefna Árna Pétur Guðjónsson með leikinn Svikarinn, Steinunn Ketilsdóttir sýnir Grímuverðlaunasýninguna Superhero og Valgeir Guðjónsson verður með einstaka tónleika. Allar upplýsingar um Act alone eru á heimasíðu hátíðarinnar á slóðinni

www.actalone.net

Um helgin fer fram hin árlega Sæluhelgi á Suðureyri. Af því tilefni ætlar Kómedíuleikhúsið að sýna leikritið Náströnd - Skáldið á Þröm. Sýningar verða alls þrjár og er forsala á allar sýningar þegar hafin á veitingastaðnum Talisman á Suðureyri. Fyrsta sýningin verður á fimmtudag kl.21.30, næsta sýning daginn eftir á föstudag kl.17 og loks á sunnudag kl.20. Miðaverð er hið gamla góða kómíska 2.500.- kr.

Nástönd - Skáldið á Þröm var frumsýnt í vor á Suðureyri og var fullt útúr dyrum á öllum sýningum. Leikurinn fjallar um alþýðulistamanninn Magnús Hj. Magnússon sem er betur þekktur sem Skáldið á Þröm. Magnús var fyrirmyndin af Ólafi Kárasyni í Heimsljósi Kiljans. Höfundar leiksins eru þeir Ársæll Níelsson og Elfar Logi Hannesson sem einnig leikstýrir en Ársæll er í hlutverki skáldsins.

Spennan magnast í Kómedíunni því senn líður að frumsýningu. Að vanda er efnið sótt í hinn frábæra vestfirska sagnaarf og að þessu sinni er einn fremsti alþýðulistamaður þjóðarinnar í aðalhlutverki. Samúel Jónsson eða Listamaðurinn með barnshjartað einsog hann er jafnan nefndur og er einmitt nafnið á okkar nýju Kómedíu. Þetta er kallinn sem gerði ævintýraveröldina útí sveit, í Selárdal, einsog barnshjartað segir oft. Veröld sem skákar öllum Disneylöndum. Hann toppaði svo allt þegar hann byggði kirkju. En hvað átti hann að gera hann vantaði jú húsnæði undir altaristöfluna sína og hvaða húsnæði hentar einmitt betur en kirkja.

Listamaðurinn með barnshjartað verður frumsýnt á sérstakri Sambahátíð í Selárdal laugardaginn 7. júlí. Sýnt verður tvisvar um daginn eða kl. 17.00 og 20.00. Líklega best að mæta bara þá því kannski verða ekki fleiri sýningar á verkinu. Höfundur og leikari er Elfar Logi Hannesson en búninga og leikstjórn annast Marsibil G. Kristjánsdóttir. Menningarráð Vestfjarða styrkir sýninguna.

Við erum kominn á fullt í undirbúning að næstu kómedíu sem verður fjórða frumsýning leikársins og jafnframt sú síðasta. Enn sækjum við í hinn gjöfula vestfirska sagnaarf. Við höfum verið á ævintýralegum og alþýðlegum nótum þetta leikárið. Næsta leikverk er sótt í sama grunn nefnilega ævintýralegi alþýðulistamaðurinn Samúel Jónsson í Selárdal. Einnig þekktur undir gælunafninu Listamaðurinn með barnshjartað og mun leikverkið einmitt heita það. Samúel var sannarlega ævintýralegur alþýðulistamaður hann byggði fjöldan allan af steypulistaverkum ljónagosbrunn, Leif heppna, strák að gefa sækýr að éta einsog ekkert sé eðlilegra. Hann málaði og tálgaði listaverk allt lék í höndum hans. Þekktasta verk hans er án efa kirkjan sem enn stendur í Selárdal. En sagan á bakvið þá bygginu er ævintýri útaf fyrir sig. Höfundur og leikari sýningarinnar er Elfar Logi Hannesson en Marsibil G. Kristjánsdóttir leikstýrir. 

Listamaðurinn með barnshjartað verður frumsýnt á sérstakri Sambahátíð sem verður haldin í Selárdal í Arnarfirði laugardaginn 7. júlí.

Á baráttudegi verkalýðsins frumsýndi Kómedía nýtt íslenskt verkamannaleikrit. Verkið heitir Í vinnufötum og slitnum skóm, með Elfari Loga sem einnig gerði leikgerðina. Verkið er byggt á bók Sigurðar Péturssonar Vindur í seglum sem fjallar um bernskusögu verkalýðshreyfingar á Vestfjörðum. Tvær sýningar voru þann 1. maí fyrst á Ísafirði og svo á Suðureyri. Skemmst er að geta þess að sýningunni var afar vel tekið og kom líklega mörgum á óvart hve stórbrotin verkalýðssagan vestfirska er. Leikurinn er tæpur hálftími í flutningi.

Á næstunni er stefnt að því að sýna Í vinnufötum og slitnum skóm víðar um Vestfirði á vegum Verkalýðsfélags Vestfjarða.

Nýtt alvestfirskt verkalýðsleikrit verður frumsýnt 1. maí á Ísafirði. Leikurinn heitir Í vinnufötum og slitnum skóm og segir bernskusögu verkalýðsfélaga á Vestfjörðum og er sérsaklega saminn fyrir Verkalýðsfélag Vestfirðinga. Verkið er byggt á bók Sigurðar Péturssonar Vindur í seglum þar sem fjallað er um verkalýðssöguna vestfirsku frá 1870 - 1930. Höfundur leikgerðar og leikari er Elfar Logi Hannesson.

Í vinnufötum og slitnum skóm verður sýnt tvívegis á baráttudegi verkalýðssins fyrir vesta. Frumsýningin verður í Edinborgarhúsinu kl.14.40 og önnur sýning verður síðan í Félagsheimilinu á Suðureyri kl.16. Fleiri sýningar á Vestfjörðum eru fyrirhugaðar á næstunni.

Nýjasta leikverk Kómedíu Náströnd - Skáldið á Þröm hefur fengið fanta fínar viðtökur. Leikurinn var frumsýndur 23. mars fyrir stútfullu Félagsheimli Súgfirðinga. Skemmst er að geta þess að fullt hús var á öllum sex sýningum verksins en aukasýningu var bætt við á Pásakadag og var sú sýning einnig uppseld. Það er því nokkuð kómískt að sýningum á leikverkinu Náströnd - Skáldið á Þröm sé lokið. En örvæntið ekki leikurinn verður settur upp að nýju á árinu. Næstu sýningar verða á hinni frábæru Sæluhelgi á Suðureyri í júlí og einnig hefur Kómedíunni verið boðið að sýna leikinn á hinni einstöku leiklistarhátíð Act alone. En gaman er að geta þess að Act alone verður einmitt haldin á Suðureyri nú í ár en þetta er níunda árið í röð sem hátíðin er haldin. Loks má geta þess að stefnt er að því að sýna Náströnd - Skáldið á Þröm á næsta Kómíska leikári. Kómedíuleikhúsið þakkar gestum kærlega fyrir frábærar viðtökur og hlökkum til að sjá ykkur aftur í leikhúsinu.

Frábærlega hefur gengið með nýjasta Kómedíukróann Náströnd - Skáldið á Þröm. Fullt hefur verið á öllum sýningum og uppselt á sýningu kvöldsins. Því er aukasýning í kvöld kl.22.30 og er miðasala þegar hafin á sýninguna í síma 891 7025. Miðaverð er aðeins krónur 2.500.-kr. Sýnt er á söguslóðum skáldsins á Suðureyri við Súgandafjörð í flotta félagsheimilinu þar.

Náströnd - Skáldið á Þröm fjallar um alþýðuskáldið Magnús Hj. Magnússon sem er betur þekktur undir heitinu Skáldið á  Þröm. Magnús var fyrirmyndin af Ólafi Kárasyni í Heimsljósi Kiljlans. Náströnd er sérlega áhrifamikið verk sem hreyfir við þér og fær þig til að hugsa dáldið um lífið og tilveruna.