Tvær nýjar bækur og Gísli hinn uppseldi

En hvers er að minnast og hvað er það þá,

sem helst skal í minningu geyma?

Svo orti og spurði skáldið Valdimar Briem í kvæðinu sem gjarnan er flutt við áramót. Kvæðið með svo alltof langa nafninu Nú árið er liðið við aldanna skaut. Víst getur það verið breytilegt hvað varðveitist í manns minningu. Mörgum finnst dægur og gærdagsminning of ríkjandi hér á landi t.d. varðandi verðlaunaveitingar. Það muna menn betur sem gjörðist í gær en hins sem fór fram fyrir einhverju síðan og hefur kannski varað, starfað, lengi. Samt hefur einmitt hinn skilað miklu meiru til samfélagsins. Oft vill þetta gleymast en líklega mun stundargleðin og tækifæristískan halda velli í samfélaginu og þá ekki síst í listheiminum.

Nú er ritari búinn að koma sér í all mikla klípu við að horfa einmitt yfir árið sem alveg er að kveðja og gjöra einsog dægurmennirnir velja úr það er minnast skal og vona svo að það muni í minningu geymist lengur en núið. Að vera stórtækur til orða er efitt þegar rætt er um eigið apparat. Samt má óhikað segja að alveg að verða búið árið sé hið sögulegasta og ef ekki bara besta ár Kómedíuleikhússins. Er dægur og stundargleðinn alveg búinn að ná tökum á ritara eða hvað? Aðeins eitt að gjöra. Líta yfir helstu Kómedíufréttir ársins 2017.

Gísli hinn uppseldi

Víst byrjaði árið með sérlega kómískum hætti og það á 13 degi ársins. Þá sýndum við Gísla á Uppsölum í Þjóðleikhúsinu. Hvernig það kom til er stutt saga að segja frá. Eftir að við höfðum sýnt Gísla yfir tuttugu sinnum hér og þar um landið árið áður við góðan orðstír sendum við erindi á Þjóðleihúsið þess efnis hvort við gætum mögulega sýnt Gísla hjá þeim. Þjóðleikhússtjóri tók vel í erindið og ákveðið var að setja á einar fjórar sýningar. Víst fór nú um Kómedíuna þá. Fjórar sýningar, vahá það er eins gott að einhver mæti. Skemmst er að segja að þessar fjórar sýningar seldust upp og einnig þær næstu sem á eftir komu. Að endingu urðu sýningarnar 20 í Þjóðleikhúsinu og nánast alltaf fyrir uppseldu húis.

Annað kómískst gjörðist á þessu sýningartímabili á Gísla í Þjóðleikhúsinu. Gaggarar tóku að mæta og rita um okkur. Þetta hefði ekki gjörst síðan tvöþúsund og eitthvað. Enda höfum við aðallega verið að sýna á landsbyggðinni hvar gaggarar lítið kikka á. Ef við sýnum í borginni þá er það oftast bara ein tvær sýningar í senn. Hvað sem má segja um gagg þá hefur það mikið að segja í leikhúsinu og bara í listalífinu. Kómedíuleikhúsið þótti sérlega vænt um að fá alla þessa gaggara loksins í leikhúsið til að kikka á vor verk. Og vitið bara hvað, gaggið var almennt mjög gott og okkur í vil. Þorgeir Tryggvason, gaggari Moggans, gaf sýningunni t.d. 4 stjörnur og sagði m.a.:

 „Trúðleikur er að sönnu í kennsluskrá Kómedíuskólans og Elfar Logi nær áreynslulaust sambandi við salinn þegar hann kærir sig um. En að sjá hann horfa inn á við og teikna upp umhverfi og viðmælendur með augunum er fallegt dæmi um list leikarans.“

Eftir gott gengi í leikhúsi þjóðarinnar hélt Gísli áfram yfirferð sinni um landið en í það heila var leikurinn sýndur 55 sinnum á árinu.

Hin G-in tvö

Það mætti halda að það sé skilyrði að leikverk Kómedíuleihússins verði að byrja á bókstafnum G. Það er ekki bara nefndur Gísli heldur og nafni hans Súrsson sem hefur verið á fjölunum lengur en elstu menn muna eða frá 2005. Fjölmargar sýningar voru á árinu flestar á söguslóðum í Haukadal í Dýrafirði en einnig í skólum. Gísli Súrsson er lang mest sýnda leikrit Vestfjarða og þó víðar væri kikkað. Alls hefur leikurinn nú verið sýndur 318 sinnum en vitið bara hvað það er hellingur af sýningum planlagðar á komandi kómísku ári. Hve tilveran er dásamleg, stundum.

Hitt G- leikrit okkar Grettir gjörðist víðförult því í lok janúar var skundað alla leið til Hjaltlandseyja. Þar var leikurinn sýndur nokkra ganga á sérstakri víkingasögu ráðstefnu, Follow the Vikings, er  haldin var í Leirvík þar í eyju. Voru það um leið síðustu sýningar á Gretti. Sýningin gekk sannlega vel og er 4 mest sýnda leikrit Kómedíuleikhússins var fluttur 61 sinni.

Tvö bókverk

Kómedíuleihúsið hefur í mörg ár duddað sér nokkuð við útgáfu. Fyrst á hljóðbókum en síðustu ár höfum við hinsvegar einbeitt okkur að bókaútgáfu. Árið 2017 gáfum við út tvö bókverk. Í júní barnabókina Muggur saga af strák eftir listahjónin Elfar Loga Hannesson og Marsbil G. Kristjánsdóttur. Um er að ræða skáldaða sögu um æsku hins bílddælska listamanns Muggs, Guðmundar Thorsteinssonar. Víst hefur listamaðurinn sá verið í miklu uppáhaldi hjá okkur. Fyrsti stóri einleikur okkar var einmitt um hans ævi einnig höfum við gert tvær barnasýningar byggðar á verkum Muggs.

Talandi um einleik sem hefur jú verið okkar uppáhald þá fannst okkur vel við hæfi að gefa út Einleikjasögu Íslands. Höfndur áðurnefndur Elfar Logi og kom bókverkið út í september. Var bókin fjármögnuð á Karolina fund og er það í annan gang sem við fjármögnum bókverk á þann hátt. Aldrei að vita nema við gjörum það á nýjan leik enda höfum við fullan hug á að halda áfram að gefa út bækur og höfum þegar ákveðið að gefa út allavega eina á komandi frábæru ári.

Lýsandi gjöf

Nú fer þessi pistill að verða alltof langur og spurning hvort allt þetta verði geymt í varanlegri minningu. Það mun hinsvegar án efa gjöra tvær sérlega lýsandi gjafir er leikhúsið fékk á árinu. Þegar við vorum á leikferð um norðurland með Gísla á Uppsölum sýndum við m.a. á Skagaströnd. Þar býr hugsjónamaðurinn Árni Geir og að lokinni sýningu færði hann Kómedíuleikhúsinu nokkra ljóskastara að gjöf. Stuttu síðar barst okkur önnur lýsandi gjöf. Kom hún frá kollegum okkar á Akureyri, já sjálfu Leikfélagi Akureyrar sem færði okkur á annan tuga ljóskastara. Kómedíuleikhúsið er upp með sér með þessar lýsandi gjafir og sannlega má segja að við verðum vel upplýst næstu árin.

Margt fleira mætti nefna á hinum bráðum búnu 2017 í daglegum önnum Kómedíuleikhússins en látum hér nóg sagt. Kómedíuleikhúsið þakkar sínum fjölmörgum styrktaraðilum, velunnurum og síðast en ekki síst áhorfendum um land allt kærlega fyrir árið 2017. Framundan er nýtt kómískt ár og mikið sem okkur hlakkar til að eiga stefnumót við ykkur öll í leikhúsinu. Það er líka margt kómískt væntanlegt þar á meðal tveir nýjir einleikir. Annar þeirra verður frumsýndur í maí hinn í ágúst og auðvitað heldur okkar tvöfalda Gíslataka áfram.

Gangi ykkur allt í vil, verum hress og njótum þess.

Elfar Logi Hannesson, vinnumaður hjá Kómedíuleikhúsinu